പട്‌ന: ബിഹാര്‍ നിയമസഭാ തെരഞ്ഞെടുപ്പിലെ മഹാസഖ്യത്തിന്റെ പരാജയത്തിന് കാരണം കോണ്‍ഗ്രസാണെന്ന് ആര്‍ജെഡി ബിഹാര്‍ സംസ്ഥാന അധ്യക്ഷന്‍ മംഗനി ലാല്‍ മണ്ഡല്‍. കോണ്‍ഗ്രസ് മഹാസഖ്യം വിടുമെങ്കില്‍ സ്വാഗതം ചെയ്യുമെന്ന് മംഗനി ലാല്‍ മണ്ഡല്‍ പറഞ്ഞു. കോണ്‍ഗ്രസ് ജയിക്കുന്നത് ആര്‍ജെഡിയുടെ ഔദാര്യം കൊണ്ടാണെന്നും കോണ്‍ഗ്രസ് ഒറ്റയ്ക്ക് മത്സരിക്കുന്നതാണ് ആര്‍ജെഡിയ്ക്ക് നല്ലതെന്നും മംഗനി ലാല്‍ പറഞ്ഞു. തേജസ്വിയുടെ കാരുണ്യത്തിലാണ് 61 സീറ്റ് കോണ്‍ഗ്രസിന് നല്‍കിയതെന്നും എന്നിട്ടും കോണ്‍ഗ്രസ് ആര്‍ജെഡിക്കെതിരെ സ്ഥാനാര്‍ത്ഥികളെ നിര്‍ത്തിയെന്നും അദ്ദേഹം പറഞ്ഞു. കോണ്‍ഗ്രസിനെക്കൊണ്ട് ആര്‍ജെഡിക്ക് ഒരു ഉപകാരവുമില്ലെന്നും മംഗനി ലാല്‍ മണ്ഡല്‍ കുറ്റപ്പെടുത്തി.
ആര്‍ജെഡി സംസ്ഥാന അധ്യക്ഷന്റെ പരാമര്‍ശത്തിനെതിരെ കോണ്‍ഗ്രസ് വക്താവ് അസിത്‌നാഥ് തിവാരി രംഗത്തെത്തി. കോണ്‍ഗ്രസ് ബിഹാറില്‍ ദുര്‍ബലമായ പാര്‍ട്ടിയാണെങ്കില്‍ എന്തിനാണ് ആര്‍ജെഡി കോണ്‍ഗ്രസുമായി സഖ്യമുണ്ടാക്കിയതെന്ന് അസിത്‌നാഥ് തിവാരി ചോദിച്ചു. ബിഹാര്‍ നിയമസഭാ തെരഞ്ഞെടുപ്പിലെ ഇന്‍ഡ്യാ സഖ്യത്തിന്റെ ഐക്യം സംബന്ധിച്ചുളള അഭിപ്രായപ്രകടനം ഇന്‍ഡ്യാ സഖ്യത്തിന്റെ ഏകോപന സമിതി അധ്യക്ഷന്‍ തേജസ്വി യാദവിനെയാണ് മണ്ഡല്‍ അറിയിക്കേണ്ടത്, അല്ലാതെ മാധ്യമങ്ങള്‍ക്ക് മുന്നിലല്ല സംസാരിക്കേണ്ടതെന്ന് കോണ്‍ഗ്രസ് നേതാവ് ഗ്യാന്‍ രഞ്ജനും അഭിപ്രായപ്പെട്ടു.
ബിഹാറിലെ 243 നിയമസഭാ സീറ്റുകളിൽ എൻഡിഎ സഖ്യം 202 സീറ്റുകളിലാണ് വിജയിച്ചത്. ഇതിൽ 89 സീറ്റ് ബിജെപി നേടിയപ്പോൾ 85 സീറ്റാണ് നിതീഷ് കുമാർ നയിക്കുന്ന ജെഡിയു നേടിയത്. പ്രതിപക്ഷ സഖ്യത്തിലെ ആർജെഡി 25 സീറ്റുകൾ സ്വന്തമാക്കിയപ്പോൾ വെറും ആറ് സീറ്റിൽ മാത്രമാണ് കോൺഗ്രസിന് ജയിക്കാനായത്. നിതീഷ് കുമാർ വീണ്ടും മുഖ്യമന്ത്രിയായി സത്യപ്രതിജ്ഞ ചെയ്തിരുന്നു. തേജസ്വി യാദവാണ് പ്രതിപക്ഷ നേതാവ്. ആർജെഡി നിയമസഭാ കക്ഷിയോഗത്തിലാണ് തേജസ്വിയെ പ്രതിപക്ഷ നേതാവായി തെരഞ്ഞെടുത്തത്.
Content Highlights: Congress is the reason for Bihar defeat: RJD leader says 61 seats were given at Tejashwi's mercy